Ақмола облысында балалар демалысын дамыту проблемасы әлі де өзекті
Зеренді ауданында «Парус» балалар сауықтыру орталығының базасында дөңгелек үстел өтті. Оның барысында қала сыртындағы балалар демалысын дамыту және осы саладағы кәсіпкерлікті қолдау мәселелері талқыланды. Іс-шараға Парламент Мәжілісінің депутаты Юлия Кучинская, облыс әкімінің орынбасары Ернар Жаркешов, бірқатар салалық министрліктер, жергілікті атқарушы органдардың өкілдері, туристік бизнес субъектілері қатысты.
Жасыратыны жоқ, бүгінде балалар демалысы мен туризм саласы айтарлықтай қиындықтарға тап болған. Қаржыландырудың жетіспеушілігі, балалар лагерлерін мемлекеттік қолдаудың болмауы, салықтық реттеумен шешілмеген мәселелер – кездесуге қатысушылар күн тәртібіне шығарған мәселелердің бір бөлігі ғана. Сондай-ақ, осы салада өз қызметін жүзеге асыратын бизнес субъектілері үшін жеңілдікті жағдай жасау, мемлекеттік субсидиялауды енгізу, балалардың демалысын сапалы әрі қолжетімді етуге мүмкіндік беретін бағдарламаларды әзірлеу, инфрақұрылымды жақсарту қажеттілігі сияқты мәселелер талқыланды.
Атап айтқанда, Ақмола облысы кәсіпкерлер палатасының Туризм және экология салалық кеңесінің төрағасы Қайрат Сұлтанов жеке лагерьлер үшін тиісті ЭҚЖЖ (экономикалық қызметтің жалпы жіктеуіші) беруді ұсынды.
«Жеке ЭҚЖЖ болған жағдайда мемлекеттік қолдау шараларын алу үшін балалар туризмінің жұмысын жүйелеуге болады. Мысалы, балалар лагерін салу кезінде шығындарды өтеудің 10-нан 25 пайызына дейін. Сондай-ақ туристік кластағы еөлік құралдарын сатып алуға 25% мөлшерінде шығындарды өтеу мүмкіндігі пайда болады», - деп атап өтті спикер.
Өз кезегінде өңірлік палатаның директоры Ерқанат Мұсылманбек 18 жасқа дейінгі оқушылар үшін ерекше қорғалатын табиғи аумақтардың аумағына жол жүру ақысын алып тастау туралы ұсыныс енгізді.
«Бұл балалардың демалысын қамтамасыз етумен қатар, ұлттық парктер аумағына жол ақысын төлеуге мәжбүр болған кәмелетке толмағандардың ата-аналары үшін үлкен жүктеме», - деп атап өтті Ерқанат Мұсылманбек.
«Звездный» балалар демалысы орталығының директоры Павел Безвербный лагерьлерге қойылатын талаптардың артуына және мемлекет тарапынан қажетті қолдаудың болмауына байланысты проблемаларға да назар аударды. Спикер шешімнің бір жолы – балалар демалысын ұйымдастыруда кәсіби көзқарасты қамтамасыз етуге көмектесетін лицензиялау екенін айтты.
«Мен лицензиялауды қолдаймын. Бұл қажет, содан кейін балалармен мұғалімдерден бастап техникалық персоналға дейін нағыз мамандар жұмыс істейді. Кәсіпкерлердің өз нысандарын бейімдеу мүмкіндігі болуы үшін оны енгізу кезең-кезеңімен жүргізілуі тиіс», - деп санайды Павел Безвербный.
«Астана кэмп» балалар демалысы орталығының директоры Мэлс Әбенов балалар лагерлерінің қауіпсіздігіне қатысты маңызды мәселені көтерді. Ол балалардың сауықтыру орталықтарын «террористік шабуылдарға осал» объектілерге қатысты заңнамалық талаптарға назар аударды, бұл бірқатар қатаң шарттардың орындалуын білдіреді: әскерилендірілген күзеттің болуы, тәулік бойы бейнебақылау, коммуникацияларға қол жеткізу және т. б.
«Мәселе мынада, барлық лагерьлерде қарапайым байланыс жоқ - интернет немесе тіпті ұялы байланыс нашар. Кейбір ауылдық округтерде учаскелік полиция қызметкері бірден бірнеше елді мекенге қызмет көрсетеді және оны лагерьдің жанынан табу мүмкін емес. Лагерьлер, әрине, өз міндеттерін орындауға тырысатын күзетшілерді жалдауы керек. Бірақ бұл сертификатталған күзет талаптарына сәйкес келмейді», - деді Мэлс Әбенов.
Қорытындылай келе, талқылауға қатысушылар осы саланың мәселелерін шешу үшін заңнамалық бастамаларды әзірлеу қажеттігін атап өтті. Юлия Кучинская өз құзыреті шегінде оларды реттеуге жәрдемдесуге дайын екенін білдірді.
Пікір қалдыру:
Пікірлер: